ಕನ್ನಡ ಕಲಿ ಶಿಕ್ಷಣ ಕಾರ್ಯಕ್ರಮ ಆಸ್ಟಿನ್ ಕನ್ನಡ ಸಂಗದ ವತಿಯಿಂದ ನಡೆಯುತ್ತಿರುವ ಲಾಭರಹಿತ ಶಿಕ್ಷಣ ಸಂಸ್ಥೆಯಾಗಿದೆ. ೨೦೧೮ ನೇ ವರ್ಷದಲ್ಲಿ ಕನ್ನಡ ಕಲಿ ಆರಂಭವಾಯಿತು. ಕಳೆದ ೨ ವರ್ಷಗಳಲ್ಲಿ COVID ನ ಎಲ್ಲಾ ಕಷ್ಟಗಳನ್ನ ಎದುರಿಸಿ ಈ ಕಾರ್ಯಕ್ರಮ ಯಶಸ್ವಿಯಾಗಿ ಬೆಳೆದು ಬಂದಿದೆ. ವಿದ್ಯಾರ್ಥಿಗಳ ಸಂಖ್ಯೆ ಈಗ ೯೦ ಮುಟ್ಟಿದೆ. ಕನ್ನಡ ಕಲಿ ಕಾರ್ಯಕ್ರಮದ ದ್ಯೇಯೋದ್ದೇಶವೆಂದರೆ - ಮಕ್ಕಳಿಗೆ ಕನ್ನಡ ಭಾಷೆಯನ್ನು ಓದಲು, ಬರೆಯಲು, ಮಾತನಾಡಲು ಹಾಗು ಸರಳ ರೀತಿಯಲ್ಲಿ ಅರ್ಥ ಮಾಡಿಕೊಡುವುದು. ಈ ಕೈಂಕರ್ಯಕ್ಕೆ ಪಣ ತೊಟ್ಟು, ಟೊಂಕ ಕಟ್ಟಿ ನಿಂತಿರುವ ನಮ್ಮ ಸ್ವಯಂಸೇವಕ ಶಿಕ್ಷಕರೇ ಇದರ ಮೂಲಾಧಾರವೆಂದರೆ ತಪ್ಪಾಗಲಾರದು.

     ಕನ್ನಡ ಕಲಿ ಕಾರ್ಯಕ್ರಮವು ಕ್ಯಾಲಿಫೋರ್ನಿಯಾದ KKNC ಕನ್ನಡ ಕಲಿ ರೂಪಿಸಿದ ಪಠ್ಯಕ್ರಮವನ್ನು ಅಳವಡಿಸಿಕೊಳ್ಳುತ್ತಿದೆ. ಇದರೊಂದಿಗೆ ಕನ್ನಡ ಕಲಿ ಕರ್ನಾಟಕದ ಪುಸ್ತಕಗಳನ್ನು ಬಳಸುತ್ತಿದೆ. ನಾವು ಬಳಸುತ್ತಿರುವ ಪಠ್ಯಕ್ರಮ ಪುಸ್ತಕಗಳನ್ನು ಕರ್ನಾಟಕ ಅಭಿವೃದ್ಧಿ ಪ್ರಾಧಿಕಾರ-ಕನ್ನಡ ಕಲಿ-ಕೆಕೆಎನ್‌ಸಿಯ ಪಠ್ಯ ಪುಸ್ತಕಗಳಿಗೆ ಕರ್ನಾಟಕ ಸರ್ಕಾರ ಮಾನ್ಯತೆ ನೀಡಿದೆ. ಕರ್ನಾಟಕ ಸರ್ಕಾರದ ಅನುಮೋದನೆ ಪತ್ರವನ್ನು ಕೆಳಗೆ ನೀಡಲಾಗಿದೆ..

     ಪಠ್ಯಕ್ರಮದಲ್ಲಿ ೬ ಹಂತಗಳಿವೆ, ಪ್ರತಿ ಹಂತವು ಕನ್ನಡ ಭಾಷೆಯಲ್ಲಿ ಕೆಲವು ಪ್ರಾವೀಣ್ಯತೆಯನ್ನು ಕೇಂದ್ರೀಕರಿಸುತ್ತದೆ ಮತ್ತು ವಿದ್ಯಾರ್ಥಿಗಳ ಪ್ರಗತಿಗಳಿಗನುಗುಣವಾಗಿ ಅವರನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯುತ್ತದೆ. ಎಲ್ಲಾ ವಿದ್ಯಾರ್ಥಿಗಳು ಮೊದಲನೇ ಹಂತದಿಂದ ಪ್ರಾರಂಭಿಸುತ್ತಾರೆ. ತರಗತಿಗಳು ಸೆಪ್ಟೆಂಬರ್‌ನಿಂದ ಮೇ ವರೆಗೆ, ಶನಿವಾರ ಬೆಳಿಗ್ಗೆ 9:30 ರಿಂದ 10:30 ರವರೆಗೆ ಮತ್ತು ಭಾನುವಾರದಂದು ಸಂಜೆ 4 ರಿಂದ 5 ರವರೆಗೆ ಆಸ್ಟಿನ್‌ನ ಚಿನ್ಮಯ ಮಿಷನ್ ಸೆಂಟರ್‌ನಲ್ಲಿ ನಡೆಯುತ್ತವೆ.